FAMETRAHANA VATO FOTOTRA BIRAON’NY FITANTANAN-DRAHARAHAN’NY HARENA AN-KIBON’NY TANY : ANKOROMBE AMBOSITRA
Tontosa ny Talata 25 Oktobra 2022 ny fametrahana ny vato fototra amin’ny fananganana Biraon’ny Fitantanan-draharahan’ny harena an-kibon’ny tany na Bureau d’Administration Minière tao Ankorombe Ambositra, Faritra Amoron’i Mania. Ny Minisitry ny harena an-kibon’ny tany sy ny loharanonkarena stratejika RAKOTOMALALA Herindrainy Olivier no nanatanteraka izany, ary notronin’ireo manam-pahefana samihafa, nahitàna ny ny Loholona sady mpampakatenin’ny Antenimierandoholona RASOLONDRATSIMBA Raymond, ny Tale kabinetra nisolo tena an-dRamatoa Filohan’ny Antenimieram-pirenena, Ramatoa RADALOSON Mamiarisoa, Governoran’ny faritra Amoron’i Mania,ny prefen’Ambositra, ny Ben’ny tanàna Ambositra, Talem-paritra sy Tale iraisam-paritra vitsivitsy ary ireo tomponandraikitra any an-toerana.
Haharitra 90 andro ny faharetan’ny fananganana io fotodrafitrasa io, izay ho toeram-piasan’ny Fitaleavam-paritry ny harena an-kibon’ny tany DRMRS Amoron’i Mania. Hisy efitra miisa 9, ary hametrahana ireo sampandraharaha isan-karazany miankina amin’ny Ministera. Volam-panjakana madiodio, amin’ny alalan’ny Ministeran’ny Harena an-kibon’ny tany sy ny Loharanokarena Stratejika no hanatanterahana izany.
Fitantanana maharitra sy lovainjafy ny harena voajanahary, sy fampandrosoana ireo Faritra manerana ny Nosy, ireo no vina napetraky ny Filoham-pirenena Andry Rajoelina. Miroso amin’ny fanatrarana ny vina tandrify azy, manoloana ny fandaharanasan’ny Governemanta ny eo anivon’ny Ministeran’ny harena an-kibon’ny tany sy ny loharanonkarena stratejika. Tafiditra ao anatin’izany ny fananganana Biraom-pitantanan-draharahan’ny harena an-kibon’ny tany na Bureau d’Administration Minière (BAM), eny anivon’ireo toerana iroboroboan’ny fitrandrahana harena an-kibon’ny tany manerana ny Nosy. Fanamby napetraka rahateo ny hoe Fanjakana manakaiky vahoaka, ka tsy hisy intsony ny Kaominina na Distrika na Faritra ho diso anjara amin’ny fampandrosoana.
Araka izany, nambaran’ny Minisitra RAKOTOMALALA Herindrainy Olivier fa laharam-pahamehana hahatrarana ny vina sy politika ankapoben’ny Fanjakana ny fametrahana fotodrafitrasa sy fampitaovana arak’olona sy ara-materialy any ifotony, ho famahana ny olan’ny mpisehatra sy ho fanamorana ny fikarakarana antontan-taratasy ilaina eo amin’ny seha-pihariana harena an-kibon’ny tany, ka hahafahan’izy ireo miasa anatin’ny ara-dalàna. Miara-manaiky ny rehetra fa miezaka hatrany ny Fitondram-panjakana mikatsaka izay hahasoa ny vahoaka izay hanamaivanana ny fahasahiranany sy mba hampirindra ny asa fivelomany, hoy hatrany izy.
Ankoatra izay, ny fisian’ny BAM dia hitondra fanatsarana kokoa ny fitantanana ny harena an-kibon’ny tany sy fanamafisana ny fanaraha-maso eny ifotony. Ho an’ny Faritra Amoron’i Mania dia Kaominina miisa 35 no ahitana asa fihariana harena an-kibon’ny tany ; anaty Distrika efatra toa an’i Fandriana, Manandriana, Ambatofinandrahana ary Ambositra izay ametrahana izao fotodrafitrasa vao haorina izao. Tsara ny manamarika fa ny Faritra Amoron’i Mania dia tafiditra ao anatin’ilay antsoina hoe Vallée des Mines, ahitana harena an-kibon’ny tany maro toy volamena, vatosoa sy metaly sarobidy isan-karazany.
MMRS/DCRI – Octobre 2022
