FARITRA VAKINANKARATRA : Fampahafantarana sy fanazavana momba ny asan’ny Polisin’ny harena an-kibon’ny Tany

Tontosa ny Alatsinainy faha 24 Jona 2024 tao amin’ny efitrano malalaky ny BCMM Antsirabe ny fampahafantarana sy fanazavana momba ireo anjara asan’ny Polisin’ny harena an-kibon’ny Tany, izay nataon’ Andriamatoa Tale misahana ny Polisin’ny harena an-kibon’ny Tany niarahana tamin’Andriamatoa Talem-paritry ny Harena an-kibon’ny Tany sy Andriamatoa Talean’ny  BCMM mpisolo toerana ao Vakinankaratra.

Narahina fanontaniana sy valiny ny fampahafantarana sy fanazavana notontosaina ka tamin’izany no nanentanan’ Andriamatoa Tale misahana ny Polisin’ny harena an-kibon’ny Tany ireo mpisehatra rehetra ny amin’ny fanarahana ny lalàna mifehy ny harena an-kibon’ny tany indrindra indrindra ny amin’ireo antontan-taratasy izay tokony hanana rehefa mikirakira harena an-kibon’ny Tany mba hisorohana mialoha ny tsy fanarahan-dalàna sy ireo sazy izay mety hiatra raha misy ny tsy fanarahan-dalàna.

 Nanatrika sy nandray anjara tamin’izany ireo solontenan’ny mpitandro filaminana avy amin’ny Zandarmaria sy ny Polisim-pirenena ao Vakinankaratra, teo ihany koa ireo mpisehatra amin’ny harena an-kibon’ny Tany ao Vakinankaratra, nahitana ireo mpivarotra sy mpividy vato, mpanodina, mpanondrana vato, tompona fahazoan-dalana momba ny harena an-kibon’ny tany sy ireo mpitrandraka artizanaly mivondrona anaty « Zone d’encadrement ».

Nankasitraka ny fiaraha-miasa efa misy eo amin’ireo mpitandro ny filaminana sy ny Polisin’ny harena an-kibon’ny tany  Andriamatoa Tale misahana ny Polisin’ny Harena an-kibon’ny tany ary nanao antso ny amin’ny hitohizan’izany hatrany amin’ny fanaraha-maso ny fivezivezen’ny vokatra harena an-kibon’ny tany, ao anatin’ny mangarahara sy tsy hisy kolikoly hatrany. Isan’ny nasongadina rahateo ny fametrahana ho zava-dehibe ny  fahitsiana, ny fahaiza-manao amin’ny asa izay sahanina,  ary ny ady amin’ny kolikoly

 Fampitam-baovao sy sary : Talem-paritra DRMIM Vakinankaratra 

DCRP/MIM – Juin 2024